തിരിച്ചു പോകണം ഒരിക്കലാ മധുരിക്കും ജീവിതകാലത്തിൽ

അമ്മയുടെ മാറ് നുണഞ്ഞ് അപ്പൻ്റെ നെഞ്ചിടിപ്പ് കേട്ട് ഉറങ്ങിയും

ഒന്നു കരഞ്ഞാൽ വാരിയെടുത്ത് മാറോട് ചേർത്ത കാലം

ഓമനത്വം നിറഞ്ഞ നിഷ്കളങ്ക കൊഞ്ചലിൽ

ഇലയിലെ മഞ്ഞുതുള്ളികളാൽ കണ്ണെഴുതിയും

മണ്ണപ്പം ചുട്ടും ചിരട്ട തുലാസ്സിൽ തൂക്കിയും

പ്ലാവില ഉടുപ്പും കിരീടവും ചൂടിയ രാജകീയ കാലം

അമ്മയുടെ വിരൽ തുമ്പിലാടി വരമ്പേ നടന്നതും

നിര അടുക്കിയ പീടികകളും മുറുക്കാൻ കടകളും

കൊച്ചങ്ങയും നൊങ്കിൻ തോടുകൊണ്ടുള്ള വണ്ടികളും

പറമ്പിലെ ചേറിൽ മഴനനഞ്ഞ് കളികളും

വെള്ളത്തിൽ കുതിർന്ന് താഴ്ന്ന പേപ്പർ ബോട്ടുകളും

മഷിത്തണ്ടിൻ മായാജാലത്താൽ മാഞ്ഞു പോയ അക്ഷരങ്ങളും

തേൻ നുകരും പൂമ്പാറ്റയെ കുപ്പിയിൽ ആക്കിയും

കുഞ്ഞിക്കാലുകൾ കൊന്നി കൊന്നി വട്ട് കളിച്ചും

ഇരുൾ കീറിമുറിച്ച് റാന്തലേറി വരുന്ന കാളവണ്ടിയും

ചീവിടിൻ ശബ്ദത്താൽ ചാണകത്തറയിൽ തണുപ്പേറി ഉറങ്ങിയും

ഓലക്കൂരവിടവിലെ സൂര്യനാളങ്ങളാൽ തഴുകി ഉണർന്നതും

മാഞ്ഞുപോയൊരാ കാലത്തിൻ പേരല്ലയോ ബാല്യകാലം......