കൂട് 1: പ്രണയം

--------------------------

പഞ്ചേന്ദ്രിയങ്ങൾക്കദൃശ്യമാമൊരുകല

പഞ്ചസായകൻ ചെയ്തുവയ്ക്കുന്നു ഭൂമിയിൽ,

ഏകകങ്ങൾക്കൊട്ടു മാറ്റു നോക്കുവാൻ പറ്റാത്ത

മനസ്സാഴങ്ങളിൽ മാത്രം അറിയുന്ന പവിത്രത..

കൂട് 2: ഓർമ്മയും മറവിയും

---------------------------------------

ജീവകോശത്തിൻ്റെ തുഞ്ചത്തുതൂങ്ങുന്ന

നീഹാരബിന്ദുവാണോർമ്മ

പ്രതിദിനം ശുഷ്‌ക സ്മരണകൾ

ബാഷ്പമായ് മറവിക്കു വഴിമാറിടുന്നു.

കൂട് 3: കിനാവ്

-----------------------

മഴവില്ലിൻ ചായം കൊണ്ട് മന്മഥനൊരു ചിത്രം തീർത്തു,

മായികമാം സങ്കൽപ്പങ്ങളെ ആവോളം വാരിനിറച്ചു

മനസ്സെന്നൊരു ചുവരിൻ നെറുകയിൽ

തെളിയുന്നാക്കരവിരുതൊക്കെ

കനവെന്നോ, കൽപ്പനയെന്നോ

പറയും നാം മാനുഷരതിനെ

കൂട് 4: നിലാവ്

------------------------

പനിമതി ഒരു നല്ല ചേലനെയ്തു,

ഭൂമിക്കിടാത്തിക്കു നൽകുവാനായ്,

പതിന്നാലുരാവുകൾ അൽപ്പാൽപ്പമായ് നെയ്തു

പൗർണമി രാവിലായ് അണിയിച്ചിടാൻ.