കാണാതെ പോയി നീ,

നിനക്കായി ചിതലഴിച്ച പുസ്തകങ്ങൾക്കിടയിൽ

ഞാനൊളിപ്പിച്ചുവെച്ച പ്രണയമന്ത്രങ്ങൾ;

കേൾക്കാതെ പോയി നീ,

നിനക്കായി മനസ്സിന്റെ മണിവർണ്ണച്ചെപ്പിനുള്ളിൽ

ഞാൻ നെയ്തുതീർത്ത പ്രണയഗാഥകൾ.

ഓല മേഞ്ഞോരെൻ വീടും,

പൂജ്യം കൊണ്ടമ്മാനമാടിയ കടലാസ്സുകെട്ടുകളും,

കാലിയായൊരു ഖജനാവും

ഒരജ്ഞാത ചരടുപോലെന്നെ വലിച്ചു...

ഇഷ്ടങ്ങളൊക്കെയും നഷ്ടങ്ങളായെങ്കിലും,

ഈ ഇളകിയാടുന്ന നെഞ്ചിൽ

ഇന്നലെകളിലെ നീയും നിന്റെ ഓർമ്മകളുമുണ്ട്;

പക്ഷേ എനിക്ക് വേണ്ടിയിരുന്നത്

ഓർമ്മകളായിരുന്നില്ലലോ... നിന്നെയായിരുന്നില്ലേ?

പറയാതെ പോയ പ്രണയവും,

ഒന്ന് പറഞ്ഞിരുന്നേൽ കിട്ടുമായിരുന്നെന്ന ദു:സ്വപ്നവും

ജീവിതം തന്നെ സങ്കീർണമാക്കുന്നു;

ഒരുപക്ഷേ ഞാനിന്നും ഒരു കാത്തിരിപ്പിലായിരിക്കും!